Ukraїner aqqında

Ukraїner, faal insanlarnıñ kiçik göñülli cemiyeti olaraq Ukrayinanı tedqiq etmek, qaydğa almaq ve em ukrayinlerni öz-özüne, em de dünyağa kösterip añlatmaq isteginden başlağan edi. 2016 senesinden başlap, memleketniñ bütün tarihiy bölgeleri boyunca ekspeditsiyalar alıp barıla: insanlarnıñ ikâyelerini toplaymız, terabaytlarnen foto ve video çekemiz.

Bugün Ukraïner tek fikirdeşler cemiyeti degil, büyük bir teşkilâttır. Bu yerde meydanğa ketirilgen 600-den ziyade göñülli ihtisaslı taqımlarğa bölünip yañı fikirler ortağa çıqara, intervyü ala, filmler çeke, foto çıqara, videolarğa transkriptsiyalar ve altyazılar yapa, metinler yaza ve olarnıñ muarrirligini yapa, bütün kontentni 12 tilge tercime ete ve onı bütün dünyağa köstere. Ukraïnerniñ multimedia malümatınıñ büyük bir qısmı bu muvafaqiyet, deñişüv, islâatlarnıñ amelge keçirilmesi, miras ve tarihiy hatıra saqlanuvı, ayrıca ukrayin kimligi aqqında qısqa videolar: til, tarih, medeniyet ve ilâhre. Ve biz memleket içinde ve tışında yayınlamaq içün toqtamay kontentniñ yañı formatlarını qıdıramız, video ve içtimaiy ağlar içün materiallarnı başqa tillerge tercime etemiz, filmler, podkastlar, kitaplar azırlaymız.

Ukraïnerniñ maqsadı bu müim mevzularnıñ aydınlatuvı, medeniy ve tarihiy mirasnıñ qoşma qıymetiniñ yaratuvı vastasınen açıq ukrayin cemiyetiniñ inkişafıdır.

Çoq vaqıt devamında ukrayin konteksti tek dünyada degil de, Ukrayinada bile ekinci planda qalıp, Rusiye imperializmi tarafından sustırıla edi. Ukrayinlerniñ er yañı nesli öz kimliginiñ ve toprağınıñ, medeniyetiniñ, adetleriniñ, keçmişiniñ qıymetinden kettikçe uzaqlaştı. İşte bunıñ içün Ukraïner, Ukrayinanıñ er bir köşesinden ikâyelerni aytıp bermege başladı ve böyle etip şimdi bulunğan yerimizge baqmadan, memleketimizniñ qıymetini añlamağa ve biz yaşağan ya da mıtlaqa qaytacağımız er bir yerimizni inkişaf ettirmege yardım ete.

Ukraïner keşif kezintisiniñ haritası

Ukraïner keşif kezintisiniñ haritası

2022 senesi kiçik aynıñ 24-nde Rusiye Ukrayinağa qarşı tam kölemli cenkni başlattı.

Aynı künü Ukraïner bağ kanallırınıñ episini yañıdan çalıştırıp, cenk ve işğalci ordular ketirgen felâketlerniñ aşması aqqında tarif etmege başladı. Eñ mümim leyhalardan biri farqlı platformalarda farqlı tillerde ukrayinlerniñ cesareti aqqında aytıp bergen ikâyeler oldı.

Tam kölemli cenk devamında Ukraïner tahliye etilgen insanlarnıñ ikâyelerini toplay, gumanitar ve arbiy desteknen oğraşqan teşebbüslerni qaydğa ala, faallernen intervyüler keçire ve urus teşviqatınıñ üstüni açıp añlata. Aynı zamanda Ukraïner zemaneviy ve canlı ukrayin tarihını añlatqan kitaplar ve memleketimizni bütün dünyağa tanıştırğan foto-albomlarnı neşir etmege devam ete.

Ukraïner, evel olğanı kibi, şimdi de bütün dünya içün Ukrayinadan ikâyeler meydançığı olıp qala. Amma evel bu ikâyeler inkişaf etken ve islâatlarğa azır olğan barışıqsever memleket aqqında olsa, bugün bu çetin küreş, qaramanlıq, işke vefadarlıq ve serbestlik oğrunda cenkleşken devlet aqqında ikâyelerdir. Bugün ukrayinler cesür qarşılıq ve ğalebe tecribesini bütün dünyağa bildirip, dünyanıñ da Ukrayinanıñ yanında demokratik degerlikler oğrunda ne içün küreşmek kerek olğanını añlatalar.

Keşif kezintisini taqip etiñiz